Gjykata Kushtetuese zhvilloi seancën lidhur me kërkesën e kryebashkiakut të Tiranës, Erion Veliaj, i cili kundërshton masën e sigurisë “arrest në burg” dhe kërkon shfuqizimin e saj.

VAZHDO LEXIMIN ME POSHTE!

Seanca u mbajt mbi bazën e dokumenteve të paraqitura me shkrim nga palët, pa praninë fizike të Veliajt dhe përfaqësuesve të SPAK në sallë.

Në përfundim të seancës nuk u dha një vendim, duke e lënë çështjen ende të hapur për shqyrtim të mëtejshëm.

Më herët, të dyja palët kishin dorëzuar argumentet e tyre të detajuara në Gjykatën Kushtetuese.

Mbrojtja e Veliajt kërkoi heqjen e masës së sigurisë, duke pretenduar se ajo është e pajustifikuar dhe e tepruar.

Sipas tij, masa e vendosur cenon drejtpërdrejt lirinë individuale dhe ka pasoja të rënda institucionale.

Ai argumenton se, për shkak të funksionit të tij si kryetar bashkie, kufizimi i lirisë ka efekt të dyfishtë, pasi ndikon edhe në ushtrimin e detyrës publike.

Veliaj pretendon se masa nuk është proporcionale me rrethanat e çështjes.

Në kërkesën e tij, ai thekson se Kodi i Procedurës Penale parashikon alternativa të tjera ndaj paraburgimit pas kalimit të një periudhe kohore.

Sipas tij, këto alternativa, si garancitë pasurore, nuk janë vlerësuar në mënyrë të plotë nga gjykatat e mëparshme.

Ai shton se standardet e një procesi të drejtë janë shkelur në të gjitha shkallët e gjykimit.

Në pretendimet e tij, Veliaj thotë se vendimmarrja e mëparshme është ndikuar nga perceptime mbi statusin dhe rrethin e tij shoqëror.

Ai thekson se gjykatat nuk janë mbështetur në prova të mjaftueshme për të justifikuar masën e vendosur.

Nga ana tjetër, Prokuroria e Posaçme mban qëndrim të kundërt, duke insistuar se ekziston dyshimi i arsyeshëm i bazuar në prova.

SPAK argumenton se ky dyshim është konfirmuar edhe në vendimet e mëparshme gjyqësore.

Sipas prokurorisë, ekzistenca e bashkëpunimit me persona të tjerë rëndon pozitën e të akuzuarit.

Po ashtu, theksohet se pozicioni i tij institucional mund të ndikojë në proces, veçanërisht në raport me dëshmitarët.

SPAK pretendon se ekziston rreziku i ndikimit mbi dëshmitarët dhe mbi bashkëpunëtorët e drejtësisë.

Prokurorët shtojnë se veprat e dyshuara mbështeten në një sërë provash konkrete të administruara gjatë hetimeve.

Kjo është hera e dytë që çështja e Veliajt shqyrtohet nga Gjykata Kushtetuese.

Më herët gjatë vitit, Kushtetuesja kishte vendosur në favor të tij në një çështje tjetër, duke e rikthyer në detyrë pas një shkarkimi të konsideruar të parregullt në aspektin procedural.