Policia britanike ka nisur hetimet pasi dy fëmijë të vegjël humbën jetën në një zjarr tragjik në një banesë në Wolverhampton, mbrëmjen e së premtes.

VAZHDO LEXIMIN ME POSHTE!

Oficerët e West Midlands Police u thirrën në vendngjarje rreth orës 20:30, së bashku me ekipet e zjarrfikësve dhe ambulancës, për të ndërhyrë në shuarjen e flakëve në Mason Street.

Zjarrfikësit hynë menjëherë në banesën e përfshirë nga zjarri dhe arritën të nxjerrin dy fëmijët e vegjël. Megjithatë, pavarësisht përpjekjeve të tyre, ata nuk mundën të shpëtoheshin dhe u shpallën të vdekur në vend.

Ndërkohë, dy fëmijë të tjerë dhe një grua kishin arritur të dilnin nga shtëpia përpara mbërritjes së shërbimeve të emergjencës. Ata u kontrolluan nga mjekët në vendngjarje dhe fatmirësisht nuk kishin nevojë për trajtim spitalor.

Sipas West Midlands Fire Service, zjarrfikësit ofruan menjëherë ndihmën e parë për fëmijët sapo i nxorën nga banesa, por dëmtimet rezultuan fatale.

Autoritetet kanë vendosur një perimetër sigurie rreth pronës, e cila ka pësuar dëme të mëdha nga zjarri, ndërsa hetimet vijojnë për të zbardhur shkaqet e incidentit.

Policia bëri të ditur se kordoni i sigurisë do të qëndrojë për një periudhë të pacaktuar, ndërkohë që ekspertët po punojnë për të përcaktuar rrethanat e sakta të ngjarjes.

Në një deklaratë zyrtare, një zëdhënës i policisë u shpreh: “Mendimet tona janë me familjarët e fëmijëve dhe të gjithë ata që janë prekur nga ky incident tragjik.”

Ngjarja ka tronditur komunitetin lokal, ndërsa autoritetet u kanë bërë thirrje qytetarëve që të bashkëpunojnë nëse kanë informacion që mund të ndihmojë hetimet.