Këngëtarja Blerina Matraku ka reaguar publikisht lidhur me një material që ka qarkulluar në rrjetet sociale dhe ku pretendohet se shfaqet ajo së bashku me kompozitorin Adrian Hila.

VAZHDO LEXIMIN ME POSHTE!

Në një deklaratë të gjatë, Matraku ka pranuar se është një prej personave që shfaqet në material, ndërsa ka zgjedhur të flasë hapur për situatën dhe pasojat që ajo ka sjellë.

Këngëtarja ka kërkuar falje për veprimet e saj dhe ka thënë se merr përgjegjësinë për vendimet që ka marrë, duke theksuar njëkohësisht se publikimi i materialit ka cenuar privatësinë e saj.

“Sot nuk dua të mbrohem, dua të kërkoj falje”, ka shkruar Matraku në deklaratën e publikuar.

Ajo i është drejtuar gjithashtu publikut, duke shprehur keqardhje për personat që mund të jenë ndier të tronditur apo të lënduar nga situata që është krijuar.

Matraku ka theksuar se nuk dëshiron të justifikojë veprimet e saj, por të marrë përgjegjësinë për pjesën që i takon në këtë situatë.

Një pjesë të deklaratës së saj këngëtarja ia ka kushtuar Klaudias, bashkëshortes së Adrian Hilës, dhe vajzave të familjes së tij, të cilave u ka kërkuar ndjesë për dhimbjen që mund t’u jetë shkaktuar.

Në reagimin e saj, Matraku ka folur edhe për besimin që kishte dhënë gjatë momenteve private dhe ka thënë se nuk e di se si materiali ka përfunduar jashtë hapësirës ku ishte krijuar.

Ajo ka deklaruar se, pavarësisht cenimit të privatësisë së saj, është e gatshme të përballet me përgjegjësinë për veprimet e veta.

Këngëtarja është shprehur gjithashtu për jetën e saj personale dhe faktin se ka mbajtur një profil relativisht të ulët publik, duke theksuar vështirësitë me të cilat është përballur ndër vite.

Në fund të deklaratës, Matraku i ka bërë thirrje publikut që të mos e shpërndajë më tej materialin që po qarkullon në internet.

“Sot ju lutem publikisht: ‘Mjaft’. Mos shpërndani më”, ka shkruar ajo, duke kërkuar respekt për privatësinë dhe duke theksuar se situata po i shkakton dhimbje të madhe.

Reagimi i saj vjen në një kohë kur materialet e pretenduara kanë shkaktuar diskutime të shumta në rrjetet sociale, ndërsa deklarata e Matraku është një nga reagimet e drejtpërdrejta nga një person që thotë se shfaqet në material.