Arrestimi i ish-shefit të policisë së Beogradit ka shkaktuar reagime të forta politike në Serbi dhe rajon. Në vend që vëmendja të përqendrohej tek hetimet dhe akuzat ndaj zyrtarëve policorë, debati publik u zhvendos menjëherë drejt Malit të Zi. 

VAZHDO LEXIMIN ME POSHTE!

Presidenti serb Aleksandar Vuçiq akuzoi Malin e Zi për “importim” të grupeve kriminale në Serbi, duke ndezur tensione të reja mes dy vendeve. 

Deklaratat e Vuçiqit erdhën menjëherë pas arrestimit të Veselin Milliqit, një prej figurave më të larta të policisë në Beograd. 

Milliq dyshohet se ka fshehur një vrasje të rëndë që lidhet me qarqe kriminale në kryeqytetin serb. 

Sipas hetimeve, ai ndodhej në restorantin ku ndodhi ngjarja dhe kishte kontakte direkte me personat e përfshirë në rast. 

Përveç tij, autoritetet arrestuan edhe disa policë të tjerë që dyshohet se kanë ndihmuar në fshehjen e krimit. 

Prokuroria pretendon se viktima ishte ftuar në takim nga vetë Milliqi me arsyetimin për të “sqaruar” konfliktet mes tyre. 

Madje, sipas mediave serbe, viktimës i ishte sugjeruar të mos merrte sigurimin personal me vete. 

Pas arrestimit, opinioni publik në Serbi priste përgjigje për përfshirjen e strukturave shtetërore në krim. 

Por në vend të sqarimeve konkrete, Vuçiq e zhvendosi fokusin tek klanet kriminale malazeze. 

Ai përmendi klanet e njohura të Kavaçit dhe Shkalarit, duke i akuzuar se kanë sjellë dhunë dhe krim në Serbi. 

Këto deklarata nuk morën përgjigje zyrtare nga Podgorica, por shkaktuan reagime në politikën malazeze. 

Deputeti malazez Nikolla Zirojeviq i quajti deklaratat e Vuçiqit të papërshtatshme dhe politike. 

Ai ironizoi presidentin serb duke thënë se sipas logjikës së tij “të gjithë janë serbë, përveç kriminelëve që qenkan malazezë”. 

Zirojeviq shtoi se pyetja kryesore nuk është nga vijnë kriminelët, por pse Serbia është bërë terren i favorshëm për ta. 

Edhe analistë serbë e panë retorikën e Vuçiqit si përpjekje për të larguar vëmendjen nga skandali në Beograd. 

Ish-ministri i policisë Bozho Prelleviq deklaroi se rasti është tepër serioz, pasi përfshin policinë, një vrasje dhe zhdukjen e trupit të viktimës. 

Sipas tij, përfshirja e mediave pranë pushtetit në narrativën kundër Malit të Zi nuk ishte rastësi. 

Ndërkohë, autoritetet serbe vazhdojnë kërkimet për trupin e viktimës, ku raportohet se është përfshirë edhe ushtria. 

Ngjarja ka rritur tensionet politike në rajon dhe ka hapur debat të madh për lidhjet mes krimit të organizuar dhe institucioneve shtetërore në Serbi.