Këshilli i Ministrave është mbledhur ditën e djeshme, duke miratuar një sërë vendimesh të rëndësishme që prekin fusha të ndryshme të zhvillimit ekonomik, kulturor dhe social në Shqipëri.

VAZHDO LEXIMIN ME POSHTE!

Një nga vendimet kryesore lidhet me përcaktimin e kritereve dhe procedurave për dhënien e licencave për bastet sportive online, një sektor që ka qenë shpesh në qendër të debatit publik dhe që tashmë synohet të rregullohet përmes një kuadri më të qartë ligjor.

Vendimi përfshin metodologjinë e vlerësimit, afatet e aplikimit, procedurat e konkurrimit dhe sistemin e pikëzimit për subjektet që do të aplikojnë për licencë, duke synuar transparencë dhe kontroll më të madh në këtë industri.

Një tjetër vendim i rëndësishëm ishte shpallja si pasuri kulturore e paluajtshme me statusin “Ansambël arkitektonik urban” e një zone në fshatin Lin, një ndër zonat më karakteristike pranë liqenit të Ohrit.

Ky vendim synon ruajtjen dhe promovimin e trashëgimisë kulturore dhe arkitekturore të zonës, duke e mbrojtur atë nga ndërhyrjet e pakontrolluara.

Gjithashtu, qeveria shpalli disa zona në bashkitë Bulqizë, Pukë dhe Lezhë si “Zona me përparësi për zhvillimin e ekonomisë malore”.

Ky status pritet të nxisë investime dhe politika mbështetëse për zhvillimin ekonomik të këtyre zonave, veçanërisht në sektorë si bujqësia, turizmi dhe prodhimi lokal.

Në mbledhje u miratua gjithashtu edhe Plani Kombëtar i Veprimit për Garancinë Evropiane për Fëmijët për periudhën 2026–2030, një dokument që synon përmirësimin e kushteve për fëmijët në nevojë.

Ndërkohë, qeveria i dha mendimin Kuvendi i Republikës së Shqipërisë për një projektligj joqeveritar që lidhet me administrimin e pasurive të sekuestruara dhe të konfiskuara, duke propozuar disa ndryshime në ligjin ekzistues.

Një tjetër vendim me rëndësi ekonomike është miratimi i ndërtimit të dy centraleve fotovoltaike në bashkitë Kolonjë dhe Devoll, të cilat nuk do të jenë objekt koncesioni dhe nuk do të përfitojnë nga masa mbështetëse shtetërore.

Një prej projekteve do të realizohet nga kompania TEKNO FIRE në njësinë administrative Mbreshtan, ndërsa projekti tjetër nga KRONOS KONSTRUKSION në afërsi të fshatit Vërnik.

Këto investime synojnë rritjen e prodhimit të energjisë së rinovueshme dhe diversifikimin e burimeve energjetike në vend.

Po ashtu, u miratua edhe dhënia e një pensioni të posaçëm shtetëror për Fatmir Qeramudin Cuka, në masën e dhjetëfishit të pensionit social, si një formë vlerësimi nga shteti.

Njoftimi zyrtar për këto vendime është bërë nga Agjencia për Media dhe Informim, e cila publikoi detajet e plota të mbledhjes së datës 26 mars 2026.