Memli Krasniqi ka njoftuar dorëheqjen nga posti i kryetarit të Partisë Demokratike të Kosovës, përmes një konference të jashtëzakonshme për media të mbajtur pasditen e së mërkurës.
VAZHDO LEXIMIN ME POSHTE!
Ai tha se një lidership që kërkon ndryshim për Kosovën, duhet të ketë edhe guximin për të krijuar hapësirë për ndryshim brenda vetes.
Krasniqi sqaroi se vendimin e kishte marrë më herët, por zhvillimet politike dhe mungesa e institucioneve e kishin shtyrë ta bënte publik më vonë.
Sipas tij, dorëheqja nuk është e lidhur me ndonjë moment të caktuar, por është rezultat i një reflektimi të gjatë për të ardhmen e partisë.
Ai theksoi se PDK ka nevojë për një energji të re dhe për një momentum të ri politik që do ta çojë përpara.
Krasniqi u shpreh se nuk ka pasur asnjëherë ambicie për t’u bërë kryeministër dhe se kandidati i ardhshëm për kryetar partie duhet të jetë edhe kandidati për kryeministër.
Në këtë kontekst, ai përmendi Bedri Hamzën si figurën më të përshtatshme për ta udhëhequr PDK-në në fazën e ardhshme.
“Nëse Bedri Hamza kandidon për kryetar, ai e ka mbështetjen time të plotë,” tha Krasniqi, duke e cilësuar mikun e tij si lider me përvojë dhe vizion.
Ai gjithashtu deklaroi se nuk është konsultuar me Hashim Thaçin apo Kadri Veselin për këtë vendim, edhe pse i respekton jashtëzakonisht si themelues të partisë.
Krasniqi nënvizoi se dorëheqja nuk nënkupton largim nga politika, pasi ai do të vazhdojë të jetë pjesë aktive e PDK-së.
“Unë mbetem këtu, me të njëjtin angazhim për ta fituar betejën politike dhe për ta larguar Albin Kurtin nga pushteti,” – u shpreh ai.
Memli Krasniqi e mori drejtimin e PDK-së në korrik të vitit 2021 dhe u rizgjodh në qershor të këtij viti, duke udhëhequr partinë në tre procese zgjedhore radhazi.