Dy ministra të qeverisë së Ganës, Edward Omane Boamah, që mbante postin e Ministrit të Mbrojtjes, dhe Ibrahim Murtala Muhammed, Ministër i Mjedisit, Shkencës dhe Teknologjisë, kanë humbur jetën në një aksident ajror tragjik. Ngjarja ka ndodhur në rajonin qendror të Ashanti-t dhe është cilësuar si një humbje e madhe për vendin.
VAZHDO LEXIMIN ME POSHTE!
Zëdhënësi i qeverisë konfirmoi se gjithsej tetë persona u vranë në këtë aksident, përfshirë edhe tre anëtarët e ekuipazhit dhe pesë pasagjerë. Aksidenti ndodhi gjatë një fluturimi zyrtar, ku delegacioni po udhëtonte drejt qytetit Obuasi për të marrë pjesë në një aktivitet kundër minierave të paligjshme.
Helikopteri ushtarak i tipit Z9 ishte nisur nga kryeqyteti Akra në orën 09:12 të mëngjesit dhe humbi kontaktin me radarët disa minuta pas ngritjes. Forcat e Armatosura të Ganës thanë se kishin humbur çdo gjurmë të fluturimit deri në gjetjen e mbetjeve në terren.
Trupat e viktimave u gjetën në vendin e ngjarjes dhe më pas u transportuan në Akra me avion ushtarak. Pamje të mbetjeve të djegura të helikopterit janë shpërndarë gjerësisht në rrjetet sociale, duke nxitur trishtim dhe reagime publike.
Shefi i kabinetit të presidencës, Julius Debrah, e cilësoi këtë si një tragjedi kombëtare dhe theksoi se vendi është në zi për humbjen e këtyre zyrtarëve të lartë dhe pjesëtarëve të shërbimit ushtarak.
Presidenti John Dramani Mahama ka pezulluar të gjitha aktivitetet publike të planifikuara për pjesën e mbetur të javës, si dhe ka shpallur tre ditë zie kombëtare që do të fillojnë nga dita e enjte.
Me urdhër të presidencës, flamujt kombëtarë do të ulen në gjysmështizë në të gjitha institucionet publike dhe private, në shenjë respekti për jetët e humbura. Populli është ftuar të bashkëndahet në dhimbjen e familjeve të viktimave.
Në një deklaratë të bërë në emër të presidentit dhe qeverisë, Debrah u shpreh se të gjithë anëtarët e delegacionit kishin dhënë jetën e tyre në shërbim të vendit dhe përpjekjeve për ta bërë Ganën më të sigurt dhe më të pastër.
Ngjarja ka tronditur mbarë opinionin publik në Ganë, veçanërisht për shkak të rolit të rëndësishëm që ministrat ndjerë kishin në politikat shtetërore dhe projektet zhvillimore. Shumë qytetarë kanë reaguar me trishtim dhe krenari për përkushtimin e tyre.
Ende nuk janë bërë publike detajet e plota mbi shkaqet që çuan në rrëzimin e helikopterit, por autoritetet ushtarake kanë nisur një hetim zyrtar për të përcaktuar nëse bëhet fjalë për një defekt teknik apo gabim njerëzor.
Zyrtarë të lartë të ushtrisë dhe qeverisë janë angazhuar në hetim, ndërsa janë krijuar edhe grupe të posaçme për të mbështetur familjet e viktimave gjatë kësaj periudhe të vështirë. Mediat vendase dhe ndërkombëtare po ndjekin nga afër zhvillimet.
Aksidenti ka sjellë në vëmendje edhe njëherë çështjen e sigurisë ajrore dhe gjendjen teknike të flotës ushtarake ajrore të Ganës. Pritet që pas hetimit të ketë edhe reagime për investime të reja në këtë sektor.