Një tjetër vatër zjarri është shfaqur pasditen e sotme në jug të vendit, këtë herë në fshatin e njohur turistik të Dhërmiut.
VAZHDO LEXIMIN ME POSHTE!
Flakët janë përhapur me shpejtësi në një zonë të mbuluar me vegjetacion të dendur dhe pranë varrezave të fshatit.
Sipas informacioneve paraprake, zjarri ka rënë në një zonë të mbjellë me ullinj, duke rrezikuar seriozisht disa prej parcelave bujqësore të banorëve.
Po ashtu, flakët janë afruar rrezikshëm pranë disa banesave të zonës, duke ngritur alarmin te banorët lokalë.
Banorët kanë shprehur shqetësimin e tyre për përmasat që po merr zjarri dhe për mundësinë e përhapjes drejt shtëpive të tyre.
Forcat zjarrfikëse janë nisur menjëherë drejt vendngjarjes për të frenuar përhapjen e zjarrit dhe për të mbrojtur banesat.
Në terren ndodhen edhe përfaqësues të emergjencave civile dhe të pushtetit vendor, të cilët po ndihmojnë në koordinimin e operacionit.
Deri në këto momente nuk ka raportime për persona të lënduar apo dëme materiale në shtëpi, por situata mbetet e paqëndrueshme.
Terreni i vështirë dhe era po e bëjnë më të komplikuar ndërhyrjen për neutralizimin e flakëve.
Autoritetet kanë nisur hetimet për të zbuluar shkaqet e zjarrit, ndërkohë që nuk përjashtohet mundësia e zjarrvënies së qëllimshme.
Ngjarja vjen në një kohë kur vendi përballet me temperatura të larta dhe një seri zjarresh në zona të ndryshme malore dhe rurale.