Pas rikthimit të arkeologëve në kalanë e Gjirokastrës, janë zbuluar fakte të reja që ndriçojnë historinë e lashtë të këtij monumenti.
VAZHDO LEXIMIN ME POSHTE!
Në një zonë ku është zbuluar një mur antik, arkeologët kanë hasur në një skelet njerëzor që besohet se i përket një mashkulli të ri.
Ajo që bie në sy është pozicioni i pazakontë i skeletit, me trupin brenda murit dhe këmbët jashtë tij, një element intrigues që mund të lidhet me zakonet ndërtimore ose ndodhi të panjohura historike.
Përkrah skeletit të njeriut, në të njëjtën zonë është gjetur edhe një skelet kafshe, i cili mendohet të jetë i një kali.
Këto dy zbulime e bëjnë më kompleks dhe interesant mozaikun arkeologjik që po zbulohet në kala.
Arkeologia Pamela Llapaj bëri të ditur se këto gjetje ndodhen përgjatë një fragmenti muri që mendohet t’i përkasë antikitetit të vonë.
Megjithatë, për skeletin njerëzor ende nuk ka përfundime të sakta rreth periudhës së tij, edhe pse ka të ngjarë që i takon po ashtu antikitetit të vonë.
Eshtrat do t’i nënshtrohen analizave të hollësishme laboratorike për të përcaktuar më mirë kohën dhe rrethanat e varrimit.
Sipas arkeologes Llapaj, një dukuri e tillë nuk është e pazakontë për atë periudhë historike.
Gjatë antikitetit të vonë, ishte praktikë e zakonshme që varrimet të bëheshin në zona të rrënuara ose në hapësira të hapura posaçërisht në struktura ekzistuese.
Zbulimi i skeleteve brenda dhe përreth mureve mund të hedhë dritë mbi mënyrën se si komunitetet e atëhershme ndërvepronin me ambientet e tyre.
Kërkimet arkeologjike në kalanë e Gjirokastrës do të vijojnë gjatë gjithë verës, në përpjekje për të dokumentuar më në detaje historinë dhe zhvillimet e këtij monumenti të rëndësishëm kulturor.