Refuzohet sërish lirimi i përkohshëm për ish-krerët e Ushtrisë Çlirimtare të Kosovës.
Pas Jakup Krasniqit, edhe Kadri Veselit dhe Rexhep Selimit u është vazhduar masa e paraburgimit për nga dy muaj.
VAZHDO LEXIMIN ME POSHTE!
Vendimi i fundit i Dhomave të Specializuara në Hagë vjen si përgjigje ndaj shqetësimeve për pengim të drejtësisë dhe ndikim mbi dëshmitarët.
Trupi Gjykues i Dhomave të Specializuara ka refuzuar kërkesat për lirim të përkohshëm për Veselin, Selimin dhe Krasniqin. Ndërkohë, paraburgimi është vazhduar edhe për Hashim Thaçin, i cili nuk ka paraqitur kërkesë për lirim.
Sipas gjykatës, ndonëse mungojnë dëshmi për rrezik arratisjeje, ekziston rreziku që të pandehurit të ndikojnë në dëshmitarë dhe të ndërhyjnë në procesin gjyqësor.
-Në vendim theksohet se të akuzuarit, për shkak të pozitave të tyre të mëparshme, mund të kenë ende ndikim të konsiderueshëm në zhvillimin e procesit.
Avokati Ardian Bajraktari e konsideron këtë vendim të padrejtë dhe të pabazuar në ligj. Ai tha se janë përmbushur kushtet ligjore për zëvendësimin e paraburgimit me masa më të lehta.
Sipas tij, ish-krerët e UÇK-së kanë dëshmuar bashkëpunim të plotë me drejtësinë dhe janë përgjigjur çdo ftese nga Dhomat e Specializuara.
Bajraktari thekson se, meqë tashmë ka përfunduar dëgjimi i dëshmitarëve të Prokurorisë, nuk ka arsye reale për të mbajtur në paraburgim të akuzuarit.
Ndërkohë, Dhomat e Specializuara kanë nënshkruar një marrëveshje me Belgjikën për mbajtjen e të dënuarve, që sipas avokatit është pjesë e detyrave normale të institucionit.
Ai përmendi Nenin 50 të Ligjit për Dhomat e Specializuara, i cili parashikon marrëveshje me shtete të treta për pranimin e të burgosurve.
Mbrojtja e Kadri Veselit kishte ofruar masa të shumta sigurie, si dorëzimi i pasaportës, mbikëqyrje nga Policia e Kosovës dhe ndalim të kontakteve të paautorizuara.
Megjithatë, pavarësisht përmirësimit të kapaciteteve të Policisë së Kosovës, Gjykata e Hagës ka vlerësuar se këto masa nuk janë të mjaftueshme për të garantuar integritetin e procesit dhe mbrojtjen e dëshmitarëve.